Casa Galega da Cultura

Na Galipedia, a Wikipedia en galego.
Casa Galega da Cultura
Fachada oeste, Praza da Constitución
CoordenadasCoordenadas: 42°14′18″N 8°43′33″O / 42.238451, -8.725875
PaísGalicia, España
CidadeVigo
TipoMultidisciplinar
AdministradorConcello de Vigo
editar datos en Wikidata ]

A Casa Galega da Cultura é un espazo multidisciplinar localizado en Vigo que acolle a realización de actividades artísticas e literarias, ao tempo que conta cun fondo bibliográfico e museográfico sobre Galicia.

Historia[editar | editar a fonte]

O edificio foi construído, baixo plano do arquitecto Jose María Ortiz Sánchez (autor tamén do edificio onde esta actualmente o Museo de Arte Contemporánea de Vigo ou MARCO), e coa dirección de obra do construtor José Antonio González Bernárdez, para substituír unha antiga sede do Concello de Vigo, que ardeu en 1851, aínda que xa ameazaba a ruína en 1809. Foi sede do Concello até o seu traslado á actual localización en 1978. Máis tarde foi restaurado para acoller os fondos da Fundación Penzol e a Casa Galega da Cultura.

Construción e estilo[editar | editar a fonte]

Trátase dun edificio sobrio e de estilo ecléctico, que ten inseridos elementos clasicistas, aínda que de xeito contido, sen artificios. Inicialmente foi deseñado con tres andares, con tres vans en cada unha e unha composición simétrica, con zócolo, pilastras e falso entaboamento, separando cada andar con liñas de imposta, ás que se suman unhas cornixas na fachada principal. Cada andar diferénciase pola súa decoración, especialmente o primeiro que ten aberto un balcón principal, dende o que aínda se fan pregóns de festas á Praza da Constitución. O treito central do edificio está salientado en todos os andares mediante pilastras apareadas, e na planta terrea salienta un almofadado corrido. Remata o edificio unha balaustrada, cun peitoril central na fachada principal co escudo da cidade e dous lucernarios.[1] Na fachada que dá á Praza da Princesa a decoración é máis restrinxina.

Museo[editar | editar a fonte]

Fachada leste, Praza da Pincesa.

O centro, antiga sede da casa do concello,[2] conta con salas de exposición temporais e permanentes na planta baixa, un salón de actos na primeira planta, dúas salas de lectura, unha delas para o uso de investigadores e as bibliotecas Penzol e Fernández del Riego e o Museo Francisco Fernández del Riego[3][4] na terceira planta.

Notas[editar | editar a fonte]

  1. Garrido Rodríguez, Xaime, 2000, A Arquitectura da Pedra en Vigo, Vigo, Construcciones Conde, p. 160-161.
  2. A Antigua Casa do Concello [sic] na páxina do concello.
  3. Museo Francisco Fernández del Riego en Turgalicia
  4. Colección de Arte Francisco Fernández del Riego na páxina do concello.

Véxase tamén[editar | editar a fonte]

Ligazóns externas[editar | editar a fonte]