Avares

Territorio tradicional dos avares (número 2) no Daguestán.

Os avares son un pobo do Cáucaso, que habita principalmente no Daguestán, onde son o grupo predominante, a súa lingua é o avar, pertencente á familia das linguas caucásicas nororientais e a súa relixión tradicional o islam sunita. Aproximadamente os avares son un millón de persoas.

Localización

A maior parte dos avares habitan territorios montañosos do oeste do Daguestán, unha minoría vive nas planicies desa república, en especial nos distritos de Buynaksky, Khasavyurtovsky e Kizilyurtovsky, en todo o territorio viven 850.011 avares. Noutras repúblicas de Rusia hai tamén minorías, así en Chechenia hai 4864, en especial nos distritos de Sharoysky e Shelkovskoy. En total en Rusia cóntanse 910.200, segundo o censo de 2010, aínda que hai que ter en conta que nos censos rusos inclúense como avares membros dalgunhas pequenas minorías andi-dido. En Acerbaixán son 50.891 segundo o censo de 1999 concentrados nas rexións de Balakan e Zaqatala. En Xeorxia hai 1996 segundo o censo de 2002 localizados na súa inmensa maioría no distrito de Qvareli. Non hai datos do número de avares en Turquía, algúns cífrannos en 53.000