Alternativa dos Veciños
| Alternativa dos Veciños (AV) | |
|---|---|
| Movemento veciñal asembleario | |
 | |
| Dirixentes e organización | |
| Líder | Ángel García Seoane |
| Historia | |
| Fundación | 1979 |
| Posicións políticas | |
| Ideoloxía | Socialismo Comunismo Progresismo Galeguismo Republicanismo Antisionismo |
| Representación | |
| Concelleiros en Oleiros | 13 / 21 |
| Concelleiros en Carral | 7 / 13 |
| Concelleiros en Fisterra | 3 / 11 |
| Concelleiros en Bergondo | 3 / 13 |
| Concelleiros en Culleredo | 2 / 21 |
| Concelleiros en Cambre | 2 / 21 |
| Concelleiros en Arteixo | 1 / 21 |
| Concelleiros en Cangas | 1 / 21 |
| Deputados provinciais na Coruña | 1 / 31 |
| Outros datos | |
| Na rede | |
| alternativadosvecinos.org | |
Alternativa dos Veciños é un partido político que actuou ao longo da súa historia no concello de Oleiros. A partir das eleccións de 2015 iniciou un proceso de ampliación coa presentación de candidaturas nos concellos da Coruña, Arteixo e Culleredo o que lle permitu entrar na Deputación da Coruña. Nos anos seguintes o partido aumentou as agrupacións locais, e así tras as eleccións de 2019 fíxose coa alcaldía do concello de Carral e entrou nos gobernos locais de Bergondo e Sada. En 2023 revalidou a alcaldía de Carral con maioría absoluta e sumou tamén a de Fisterra, manténdose ademais no goberno de Bergondo.
Orixes[editar | editar a fonte]
Ten a súa orixe na creación dunha candidatura independente para as eleccións municipais de 1979 que representase ás distintas asociacións de veciños do concello co nome de Candidatura dos Veciños. Xosé Luís Martínez, o candidato á alcaldía, resultou elixido alcalde por unha ampla maioría absoluta. A formación logrou unha acta na Deputación da Coruña, a cal foi ocupada por Anxo García Seoane.
Nas eleccións de 1983 presentouse xa como Alternativa dos Veciños, dirixida por Anxo García Seoane. Malia inicialmente non lograr a alcaldía, en maio de 1985 asumiuna trala dimisión do entón alcalde José María del Monte González, co cal cogobernaran ata ese momento. Dende 1991 AV está rexistrada como partido político, presidido por Anxo García Seoane.
Organización[editar | editar a fonte]
Alternativa ten unha vida interna na que participan habitualmente unhas 2.000 persoas, representadas pola Comisión de Seguimento e o Comité Executivo, órganos de elección asemblearia nas distintas parroquias do Concello. Alternativa concorre aos procesos electorais despois de procesos abertos entre os que se seleccionan candidatos, elixidos en primeira instancia por asembleas parroquiais. Os 30 elixidos (3 por cada parroquia) sométense ás eleccións abertas, unhas primarias nas que adoitan participar unhas 5.000 persoas e que serven para confeccionar as listas electorais ao concello.
As persoas que saen elixidas como concelleiros son controlados polo Comité Executivo e este pola comisión de seguimento.
Este sistema de implicación cidadá na xestión municipal ten o seu reflexo nos orzamentos participativos do concello, no que toman parte as entidades veciñais de cada parroquia.
Os resultados da acción política da Alternativa en Oleiros son os maiores índices de parques e espazos públicos por habitante de Galicia, o maior índice de investimentos públicos municipais, unha rede de 10 bibliotecas públicas equipadas e activas, unha rede de 15 centros sociais e culturais, tres auditorios públicos e o maior número de vivendas de promoción pública por habitante.
En xuño de 2006 o fiscal xefe de Galicia presentou unha denuncia por prevaricación contra García Seoane[1], o que provocou tensións no seo do goberno municipal formado por AV e BNG. En setembro de 2006, unha nova denuncia do fiscal polos intereses urbanísticos do alcalde e as sospeitas de corrupción provocaron a saída do goberno municipal do único concelleiro do BNG. Dende entón AV goberna en minoría.
En abril de 2011 o fiscal solicita o arquivo da denuncia contra Ángel García Seoane, por entender que os delitos que se lle atribuían non aparecen suficientemente xustificados[2][3].
Eleccións[editar | editar a fonte]
- Artigo principal: Eleccións municipais en Oleiros.
- 1987: 3.296 votos (40,46 %), 8 concelleiros.
- 1991: 4.362 votos (53,2 %), 10 concelleiros.
- 1995: 4.913 votos (42,53 %), 9 concelleiros.
- 1999: 5.583 votos (41,28 %), 9 concelleiros.
- 2003: 7.286 votos (45,4 %), 10 concelleiros.
- 2007: 6.249 votos (37,37 %), 9 concelleiros.
- 2011: 8.343 votos (48,35 %), 11 concelleiros.
- 2015: 9.830 votos (60,68 %), 14 concelleiros.
- 2019: 10.498 votos (58,71 %), 13 concelleiros.
- 2023: 9.274 votos (54,28%), 13 concelleiros.
 |
Notas[editar | editar a fonte]
- ↑ " El fiscal jefe de Galicia denuncia al alcalde de Oleiros por prevaricación", artigo en La Opinión, 2 de xuño de 2006 (en castelán).
- ↑ "El fiscal solicita archivar la denuncia contra Seoane por acciones urbanísticas", artigo en La Opinión de A Coruña, 9 de abril de 2011 (en castelán).
- ↑ "El fiscal exime a García Seoane de un delito de prevaricación", artigo en A Voz, 9 de abril de 2011 (en castelán).