Aegean Sea

Áncora do Mar Exeo no Aquarium Finisterrae.

O Aegean Sea, tamén coñecido pola súa tradución galega de Mar Exeo, foi un petroleiro de bandeira grega que accidentou na costa da Coruña o 3 de decembro de 1992.

Características do barco

O buque, construído en Xapón en 1973, tiña 261,02 metros de eslora por 40,67 de manga, con 15,93 m de calado máximo e unha capacidade de carga máxima de 114.000 toneladas de cru, dobre casco e 28 tripulantes Procedente do mar do Norte, transportaba 79.081 toneladas de petróleo Brent Blend (cru lixeiro) cara á refinaría de Repsol na Coruña, das que verteu ao mar unhas 67.000. As investigacións posteriores comprobaron que superara satisfactoriamente todas as inspeccións e revisións ás que fora sometido. O capitán era o grego Constantinos Stavridis.

O accidente

Na madrugada do 3 de decembro de 1992 o Aegean Sea entraba no porto da Coruña nunhas condicións meteorolóxicas adversas, cuns ventos por riba dos 100 km/h e unha visibilidade inferior aos 100 m. Por culpa dun golpe de mar —segundo o capitán do barco— ou por seguir unha manobra incorrecta —segundo a Dirección Xeral da Mariña Mercante— o buque non seguíu a enfilación fixada polos prácticos e rematou encallando contra os baixos rochosos da Torre de Hércules, preto da boca da Ría. Segundo a información do capitán, eran as 4:50 horas.

Ás oito da mañá o buque fende e estoura fronte á torre de Hércules, moi preto da bocana do porto. Ás 9:45 o buque estaba fendido e a proa afunde a 50 m de profundidade. Rapidamente o barco botouse a arder, pois o gas inerte dos tanques avivou a combustión. Dende algo máis de media hora antes o capitán autorizara a evacuación dos seus 28 tripulantes, que son rescatados polos helicópteros de rescate Helimer Galicia, Pesca I e Pesca II, xunto ao barco da Cruz Vermella Blanca Quiroga.

Non houbo vítimas humanas. Foi preciso evacuar os veciños do barrio de Durmideiras, o máis próximo, e unhas 300 familias pasaron unha noite fóra dos seus fogares. Unha nube de fume procedente do buque cubriu durante unhas horas o ceo da cidade, se ben á tarde rolou a oeste e a nube desprazouse cara a Ferrol.

A pesar de que se consiguiu extraer unhas 6.000 toneladas de cru, a maior parte verteu ó mar ou ardeu; outra parte da carga evaporouse grazas á volatibilidade dese tipo de petróleo. A escaseza de barreiras anticontaminantes e a rotura dalgunhas delas foron os primeiros problemas para frear unha marea negra que chegou a cabo Prior e afectou a ría da Coruña, a de Ares, a de Betanzos e a de Ferrol. En total resultaron afectados uns 300 km de costa, limitando a actividade de máis de 4.000 pescadores, mariscadores e operarios de depuradoras de moluscos e outras industrias da acuicultura. As reclamacións presentadas en concepto de indemnización aproximáronse ós 300 millóns de euros.

As cifras de animais mortos varían entre as 500 da Mariña Mercante^{[Cómpre referencia]}, e os 26.000 conforme os grupos ecoloxistas^{[Cómpre referencia]}. A enferruxada popa do Aegean Sea, arrastrada polas ondas ata os cons da torre de Hércules foi durante anos un atractivo turístico. Finalmente foi vendido como chatarra nunha poxa a unha empresa asturiana. A áncora consérvase no Aquarium Finisterrae.

As indemnizacións ós afectados comezaron a pagarse no ano 2002 despois dun longo proceso xudicial no Tribunal Superior de Xustiza de Galicia.

Véxase tamén

Bibliografía

• Colectivo de Marinos SLMM-CCOO: Aegean Sea, La verdad de una catástrofe repetida. Ed. Toxosoutos, Muros 1994.
• "El Mar Egeo sigue varado tras 15 años", en Los domingos de La Voz de Galicia, nº 543, de 2 de decembro de 2007.

Outros artigos

• Cason
• Polycommander
• Prestige

Ligazóns externas

• Centre de Documentation, de Recherche et d'Expérimentations sur les Pollutions Accidentelles des Eaux. (en francés)
• Using ERS-1 SAR images for oil spill surveillance Imaxes aéreas do desastre (en inglés)
• Y no sería el último desastre, Artigo en La Voz de Galicia, 2 de decembro de 2007.
• Luis Jar Torre: El castañazo, publicado na Revista General de Marina, xuño de 2004 (en castelán)