Acerbaixán - Azərbaycan

A República de Acerbaixán atópase no Cáucaso ó borde do Mar Caspio, limita con Rusia polo norte, con Xeorxia e Armenia polo oeste e con Irán polo sur. A República Autónoma de Nakhichevan (un enclave de Acerbaixán) limita con Armenia ao norte e ao leste, Irán ao sur e oeste e Turquía ao noroeste.

[editar] Historia

Pertencente a Irán (por entón Persia), Acerbaixán foi ocupado por Rusia no século XVIII, estando dividido o territorio ata entón en tres provincias: Arran, Shervan e Nakhjavan.

A administración rusa comezou a fins do século XIX a explotación dos campos petrolíferos de Bakú. Trala revolución do 1917, toda a Transcaucasia acadou a independencia, mais rematada a guerra civil foi reincorporada á nova URSS, co status de República.

Acadou definitivamente a independencia no 1991.

[editar] Goberno e política

Acerbaixán é unha República presidencial. O Presidente elíxese por un período de 5 anos. O poder lexislativo está en máns da Asemblea Nacional, un organismo elexido democraticamente e que consta de 50 membros.

A maioría de idade está establecida nos 18 anos.

Os críticos do sistema político considérano en realidade unha cleptocracia. A corrupción está instalada en todolos niveis.

[editar] Economía

A pesar dos abundantes recursos petrolíferos, o país non puido saír do marasmo económico que seguiu ó derrumbamento da Unión Soviética.

A economía está baseada na industria, incluíndo construción de maquinaria, refinado de petróleo (do que o país é un produtor moi importante), industria textil e química.

A agricultura representa un terzo do PIB. Os regadíos están moi extendidos. Nas terras baixas, preto de Mar Caspio o clima permite o cultivo de algodón, frutas, té, tabaco e outros cultivos típicos dos climas subtropicais. O verme de seda é cultivado para o seu aproveitamento na industria téxtil. Nas zonas montañosas do norte e do oeste practícase a gandería: vacas, ovellas e cabras. No Mar Caspio practícase a pesca, entre a que hai que citar a do esturión.

[editar] Demografía

Arredor do 80% da poboación é etnicamente azerí (musulmáns de lingua pertencente á rama altaica da familia uralo-altaica, igual que, por exemplo, o turco). Este pobo está presente en Irán, onde existen dúas provincias de igual nome.

O resto da poboación é rusa, armenia e de outras etnias.