A Barciela

Para outras páxinas con títulos homónimos véxase: A Barciela (homónimos).

A Barciela
Casa do concello de Oroso, en Sigüeiro
Concello:	Santiago de Compostela e Oroso
Área:	5,55 km²
Poboación:	(Ano 2009) 374 hab.
Densidade:	67.38 hab./km²
Entidades de poboación:	11

Santo André da Barciela é unha parroquia dividida en dous concellos: Oroso e Santiago de Compostela. O río Tambre serve de límite natural para a división administrativa, mais o medre urbanístico da vila na zona orosán detense na marxe compostelán da parroquia.

Historia da parroquia

Resulta imposible data-la creación da parroquia ou a construción do primeiro templo. Só podemos establecer que a igrexa actual e maila casa reitoral datan de 1917. Concretamente o templo foi consagrado o 30 de xullo de 1917, nunha celebración presidida polo Bispo Auxiliar da diocese Ramiro Fernández Balbuena, sendo párroco Severino Ramos. Desgraciadamente a documentación que se conserva remóntase a 1871, por mor dun incendio que devorou a reitoral sita daquela no lugar da Barciela.

A partir dos libros conservados podemos facer un listado dos sacerdotes que serviron ou serven á parroquia.

• Juan Otero Martínez
• Ramiro Fernández Rodríguez
• Severino Ramos Sánchez
• Ramón García Noche
• Jesús Balo Rodríguez
• Juan Calvo Tojo
• Manuel Ángel Blanco Vázquez

Existiron tres confrarías entre finais do século XIX e comezos do XX. Así na documentación antiga consta a Confraría do Santo Rosario (entre 1871 e 1929, aproximadamente), a finalidade da cal era fomenta-lo rezo desa oración entre os fieis. Tamén había una Confraría adicada a honrar San Blas, de gran devoción na nosa freguesía. Nos libros vellos aparece unha listaxe de membros activos e vocais, con referencia explícita ós cargos directivos de presidente, secretario, mordomo, depositario e recadador. Pero as Confrarías das que temos máis información son as da Doutrina cristiá e maila do Sagrado Corazón, os datos principais da cales aparecen detallados nas ligazóns antes mencionadas. Un pouco máis tarde, a finais dos anos 40 do século XX, aínda aparecería a asociación Fillas de María.

Unha das devocións máis populares na parroquia, a Santa Eufemia, virxe e mártir, aparece documentada nun libro antigo que detalla funcionistas e celebracións entre 1917 e 1934. A función de Santa Eufemia, segundo ese libro, foi inaugurada o 16 de setembro de 1917. A Reliquia, xunto coa de San Ramón Neonato, foi regalo do padre Lorenzo, superior dos Trinitarios de España; o relicario foi regalo de Manuel Batanero Flórez; a imaxe e mailo andar foron construídas nos obradoiros do Sr. Rivar de Santiago, costeados os gastos por Josefa Varela Sánchez, natural desta parroquia e veciña da cidade de Santiago e o seu home Prudencio Fernández Léis.

Na actualidade existe unha nova confraría constituída no ano 2008 na advocación da Virxe das Dores e o Cristo Nazareno que realiza as actividades da Semana Santa.

División da parroquia

En 1995 comezaron as reivindicacións dos veciños para integrar toda a parroquia da Barciela no concello de Oroso, o que non conseguen integramente, xa que en febreiro de 2005 o consello da Xunta de Galicia acordou a integración dos lugares de Sigüeiro e A Foca en Oroso, mentres o resto da parroquia permanece no concello de Santiago de Compostela. Logrouse así xuridicamente a constitución dun único núcleo urbano formado polos dous Sigüeiros, o de Oroso e o que antes pertencía a Santiago.

Lugares e parroquias

Lugares da Barciela

Lugares da parroquia da Barciela no concello de Oroso (A Coruña)
A Foca | Sigüeiro

Véxase tamén

Outros artigos

• Lugares de Santiago de Compostela
• Lugares de Oroso

Ligazóns externas

• Web Municipal de Santiago de Compostela
• Web do Concello de Oroso
• Por Sigüero Pasa Lixeiro
• Blog sobre Sigüeiro
• Fotos de Sigüeiro- Santo André da Barciela
• Páxina da parroquia de Santo André da Barciela - Sigüeiro