Saltar ao contido

Día das Letras Galegas

1000 12/16
Na Galipedia, a Wikipedia en galego.
(Redirección desde «Día das letras galegas»)

Celebración no Teatro Principal de Pontevedra, 17/5/2018.

O Día das Letras Galegas é un día de exaltación da lingua de Galicia a través da súa manifestación literaria. Comezou a celebrarse o 17 de maio do 1963, coincidindo co centenario da primeira edición de Cantares gallegos, de Rosalía de Castro.

Ata 2024, ano dedicado a Luísa Villalta, 64 autores (6 mulleres e 58 homes) foron homenaxeados nas 62 edicións do Día das Letras Galegas, posto que en 1998 houbo unha homenaxe colectiva (en concreto, a tres trobadores ligados á ría de Vigo).

Historia[editar | editar a fonte]

Manifestación na defensa da lingua o Día das Letras de 2018, en Compostela.
Manifestación do 17 de maio de 2024.

O 20 de marzo de 1963, tres membros da Real Academia Galega (Manuel Gómez Román, Xesús Ferro Couselo e Francisco Fernández del Riego) presentaron nesta institución a proposta de celebrar o 17 de maio para recoller o "latexo material da actividade intelectual galega". Estimaban que o poemario de Rosalía era a primeira obra mestra da literatura galega contemporánea, é dicir, considerábana a primeira obra do Rexurdimento. Realmente, descoñécese a data real de publicación do libro, pero tomouse ese día pola dedicatoria autógrafa de Rosalía de Castro á tamén escritora Cecilia Böhl de Faber (Fernán Caballero).[1]

Para conmemorar o primeiro Día das letras galegas (DLG) publicouse unha edición crítica de Cantares gallegos, feita por Fermín Bouza-Brey. A festividade tivo un alcance e unha significación extraordinarios, e foi moi ben acollida non só a nivel literario senón tamén nos ambientes populares.

Oficialmente, trátase dun día de carácter festivo en toda Galicia desde 1991.[2][3]

En 2020, por mor da pandemia da COVID-19, a Academia anunciou que por primeira vez nos seus 57 anos de historia o pleno de celebración do Día das Letras non decorrería o 17 de maio, trasladándose no seu lugar ao 31 de outubro, xusto un día despois do 110 aniversario do homenaxeado, Ricardo Carballo Calero.[4] Finalmente, as restricións sanitarias fixeron que o acto se tivese que adiar de novo, até o 12 de decembro[5].

Proceso de escolla[editar | editar a fonte]

A institución encargada de elixir a figura homenaxeada é a Real Academia Galega.[6] Segundo os seus estatutos, debe ser escollida na primeira reunión despois do Día das Letras Galegas.[6] Os criterios para a súa elección son que "a figura elixida deberá ser autora dunha obra relevante en galego e persoa de calidade cultural e humana que mereza propoñerse como exemplo á sociedade galega de hoxe".[6] Ademais, deben pasar dez anos dende o seu falecemento e cómpre que a proposta estea asinada por un mínimo de tres académicos.[6]

Algunhas das figuras que foron propostas, mais que non foron escollidas son: Celestino Fernández de la Vega,[7] Antón Tovar,[8] Federico García Lorca e Ánxel Casal,[9] Adolfina Casás Rama, Rosa Casás Rama e Florencio López Fernández (representantes do cancioneiro popular),[10] Fiz Vergara Vilariño,[11] Plácido Castro,[12] Antonio Fernández Morales,[12] Ramón de Valenzuela,[13] Eusebio Lorenzo[14] e Francisco Vales,[13] entre outros.

Galería de imaxes[editar | editar a fonte]

Artigo principal: Galería de imaxes sobre o Día das Letras Galegas.

Homenaxeados[editar | editar a fonte]

Notas[editar | editar a fonte]

  1. ↑ Fernández del Riego, Francisco (1995). "Prologo". De Rosalía a Dieste 33 anos das letras. Xerais. ISBN 84-7507-878-8. 
  2. ↑ F. Freixanes, Víctor (13/5/2006). "O Día das Letras (¿festivo?)". La Voz de Galicia. 
  3. ↑ "Día das Letras Galegas". Galicia Hoxe. 16/5/2007. Arquivado dende o orixinal o 01/02/2018. Consultado o 31/01/2018. 
  4. ↑ "A Real Academia Galega traslada o pleno do Día das Letras Galegas ao 31 de outubro". Real Academia Galega. 8/4/2020. 
  5. ↑ "A RAG celebra a Carvalho Calero como referente do". Real Academia Galega. Consultado o 2021-10-29. 
  6. ↑ 6,0 6,1 6,2 6,3 "Historia". Real Academia Galega. Consultado o 2024-06-06. 
  7. ↑ "A RAG escollerá as Letras 2015 entre Carvalho Calero, Filgueira Valverde, Xela Arias, Manuel María e Celestino Fernández de la Vega". Praza Pública. 2014-07-03. Consultado o 2024-06-06. 
  8. ↑ "A Real Academia Galega elixe a Luísa Villalta para o Día das Letras Galegas do 2024". La Voz de Galicia (en castelán). 2023-06-29. Consultado o 2024-06-06. 
  9. ↑ "Ánxel Casal e Lorca, unha proposta conxunta para o Día das Letras Galegas". La Voz de Galicia (en castelán). 2021-06-30. Consultado o 2024-06-06. 
  10. ↑ "Luísa Villalta e o cancioneiro popular, favoritos para a homenaxe do Día das Letras 2024". La Voz de Galicia (en castelán). 2023-06-29. Consultado o 2024-06-06. 
  11. ↑ "Ánxel Casal e Lorca, unha proposta conxunta para o Día das Letras Galegas". La Voz de Galicia (en castelán). 2021-06-30. Consultado o 2024-06-06. 
  12. ↑ 12,0 12,1 Pontevedra, Diario de (2016-07-09). "La RAG elige este sábado al autor a quien se le dedicarán las Letras Galegas de 2017". Diario de Pontevedra (en castelán). Consultado o 2024-06-06. 
  13. ↑ 13,0 13,1 Diario, Nós (2013-06-18). "Seis nomes, ningunha muller, pechan a lista de candidatos ao Día das Letras Galegas". Nós Diario. Consultado o 2024-06-06. 
  14. ↑ "A RAG elixe o sábado a figura literaria que protagonizará o Día das Letras de 2018". Real Academia Galega. 2017-06-13. Consultado o 2024-06-06. 

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]

Traído desde «https://gl.wikipedia.org/w/index.php?title=Día_das_Letras_Galegas&oldid=6754338»